निशा

प्रीत गहिरो पुरानै, कहानी नौलो भएर बसेछ !
बात अधुरै रातको, बिहानी स्वप्निल बनेर बसेछ !!

चन्चल ओठ मुस्काउदा युग बित्छ शनै शनै !
मायाको रङ हजार, हजार पुतली रमेर बसेछ !!


जिउनुको अर्थ खोज्दैमा बितेछ जीवन कसैको !
हराएर जीवन प्रीतमा कोही जीवन्त मरेर बसेछ !!


लुकामारी खेल्दै जुन सुख दु:ख गाउछ रित यहाँ !
अङ्गालोमा बेरिई युगल स्वर्गिय आनन्द रचेर बसेछ !!

अँधेरीमा रम्दै निशा मदमस्त घुम्छिन 'पवन'सँग !
हरपलमा युग अटाउदै चखेवा इश्कमा संगीत भरेर बसेछ !!

दियो पाला

दोबाटोमा आज पनि म तिमीलाई कुरिरहेछु, रङीबिरङी यादहरुको रोङटे पिङमा झुलिरहेछु !!जस्तो छोडि गएकी थियौ आज पनि उस्तै छु, ढिकि जातो एक्लिए, थाती रहेको गुन्द्री बुनिरहेछु !! सुनसान लाग्छ रङ्गमन्च सयौंको भिडभाडमा, एक्लै बस्दा कन्दरामा हजार गुन्जन सुनिरहेछु !! खुशी जति सबै सबै तिम्रै नाममा सारीदिए, शितल लाग्छ सिस्नु पनि घरि घरि छुईरहेछु !! दियो पाला ब्युताउछु हरेक साँझ घाम ढल्दा, निमेशभर छैन भरोसा, मृत्यु छेउ पुगिरहेछु !!

मायाको घेरो

सबै सबै म नै हुँ तिम्रो अनी तिमी मेरो
पाइन कही तिमी जस्तो यो संसारको फेरो

उदाउनु भन्दा अस्त हुँदा रङीन हुन्छ गगन
निशाहुँदा गाह्रै पर्ला बिर्सिदिन यो मायाको घेरो

गीत भन संगीत भन, भन मनको प्रीत
लाइदेउ माया एकबार, जोवन नफालन खेरो

के नाम के मान, के काम लाग्छ धन
जानुछ एक्दिन उही बाटो गर्छौ किन मेरो तेरो